Home

Vdiq Dekani i Fakultetit të Turizmit, Prof. Dr. Iljas Huseini
Prishtinë, 02 korrik 2009- Sot në fshatin Vrutok të Komunës së Gostivarit të Maqedonisë, varroset Dekani i Fakultetit të Turizmit të Universitetit “Pjetër Budi”, prof.dr.Iljas Hyseini, i cili vdiq papritur, pas një sëmundje të shkurtër.

Dyzet e pesë vjeçari Iljas Hyseini ka lindur më 06 janar 1964, në Gostivar të Maqedonisë. Shkollimin fillor dhe të mesëm e kreu në vendlindje, kurse ka studiuar në Universitetin e Prishtinës, në degën e Historisë. Studimet për master i ka përfunduar në Universitetin “Shën Klementi i Ohrit” – në Ohër, kurse doktoraturën në ISPPI Shkup.

Në Universitetin “Pjetër Budi”, profesor Huseini ka qenë Dekan i Fakultetit të Turizmit dhe Hotelerisë, ndërkaq ka ligjëruar lëndët: marrëdhëniet me publikun, psikologjia e punës, psikologjia e biznesit, komunikimi afarist, e drejta civile, komunikimi afarist dhe komunikimi në turizëm.

Gjatë punës në këtë Universitet, profesor Hyseini është dalluar për veti të larta njerëzore, sinqeritet, guxim dhe përkushtim në punë. Studentët e kanë vlerësuar si njërin ndër pedagogët më të dalluar, i cili në ligjërim aplikonte format dhe metodat më bashkëkohore të mësimdhënies.